Gwapa syudad ta: pang-World City Prize 2015 (III)

Mga hinigugma ko nga tumuluo ni Hesukristo, hingalitan ta ining higayon sa pagbuylog sa kalipay kag himaya sa pagkunsad kang espiritu santo sa Pentecoste matapos ang mahimayaon nya nga pagkabanhaw kag pagkayab sa kalangitan.

Aleluyah, praise the Lord, amen!

Igampo naton sa dios makagagahum nga amay, dios anak kag dios espiritu santo nga bugayan nila pinalangga ta nga Syudad kang Yrong-Yrong agud masungkit sini ang padya bilang Lee Kuan Yew World City Prize 2015. Napilian kita bilang pumalasakop (nominee) diri naghatag dungog kag daku nga kahigayunan sa pagdagsa kang duro mga turista kag imbestor.

Daku aton tsansa nga magdaug. Mga pinalangga ko nga utod kay Hesukristo, buligan ta Syudad kang Yrong-Yrong pinaagi sa pagsulat kang mayad nga butang: ini matahum, malimpyo, matawhay, malinong, matalunsay, masinadyahon, etc.

Isulat lang kamatuoran, indi kita magbinutig, kag i-email dayon sa search committee. Ugaling, kun sobra na gid katuod, likawan ta lang pagsulat kaday-a. Ano, pakahuy-an ta syudad ta?

Likawan ta pagsulat kang tuod-tuod nga kahimtangan kang basurahan tuya sa Calajunan.

Ang ingud ta nga banwa pareho kang Oton kag Santa Barbara, ang andang basurahan ginapamasyaran kang mga tawo kay limpyo. May mga garden-garden kang urutanon kag ornamental plants, may mga kahoy kag nami lagawan hay wara it bahu. In other words, ang ila garbage disposal, nahimo na nga “sanitary landfill” kag nagatuman sanda sa RA 9003 ukon Ecological Solid Waste Management Act of 2001.

Ang aton tana sa Calajunan, open dumpsite pa gihapon. Gatinumpok lang mga basura – plastik, metal, toxic materials pareho sa battery kag ponder-nga-suga, usik sa balay, sanga kag dahon kahoy, etc. Banned na kang RA 9003 ang open dumpsite apang ang aton tana, daw sa waay lang sa bungog hay may pera sa basura, este may pera sa kontrata sa basura.

Sadtong 2010, tapos eleksyon, nangutang syudad it P90M para ibakal it tatlo ka heavy equipment para Calajunan. Lunsay segunda mano day-a kag gin-overpriced pa. Wala abtan sangka tuig, nagrulop-og ron tanda. (Tlad, ang brand new nga Volvo heavy equipment sarang mo mabakal it P6M. Pangkuta lang si Kgd. Indo Paluay kang Pototan hay man-an na day-a.)

Tlad, agto ka sa Calajunan, rayo pa ginakutot don kang usbong ka basura irong mo. Ang mga ingod n'a nga pamalay hasta sa Pakiad, Oton, gareklamo hay gabinagrong lang mga langaw, lagong kag bangaw halin sa open dumpsite.

Ang dumpsite, nagalapad it 26 ektaryas.

Kang 2013, nag-utang naman Syudad ti P290M para kuno maghimo sanitary landfill. Pero tubtub subong, bisan espiritu santo wara kamaan kun diin nagkadto ang pilak kag kun paano day-a gin-gasto, kag labaw sa tanan, kun diin dun ginhimo nanda nga sanitary landfill.

Bawal kag banned don tlad ang open dumpsite parehas kang Calajunan. Amo nga indi gid kita magmitir-mitir sulat sini hay basi makalab-ot sa search committee kang Lee Kuan Yew World City Prize. Madisgrasya tsansa ta nga masungkit ang premyo.

Sa liwat, mga hinigugmang isigtumuluo, igampo ta kay Hesukristo nga kaluy-an Syudad kang Yrong-Yrong kag mangin World City Prize champion sa 2015.

Aleluya, praise the Lord, amen!

Kag ang mga agi, ipanglansang sa krus!